Pllaqitë e Korçës dhe pordhët e Tiranës - Nga Edison Ypi

Rrugës për në Korçë lokalet janë plot me aristotela lokalë, platonë, konfucë, sokratë, shekspira, frojdë, dostojevskë, Konica, Nola. Gjithologët autodidaktë, profesor-doktorat e improvizuar që i kanë shndërruar lokalet në auditorë në natyrë, para tavolinave me kafe, raki, mëlçi, mish, peshk, birrë, salcë kosi, bukë të thekur, flasin me zell për gjithçka; Fatet e kombit, hallet e popullit, politikën, gjeopolitikën, diplomacinë, intrigat ndërkombëtare, ekonominë, bankat, luftrat, krizat e monedhave, keqësimin e klimës, barazimin e stinëve, fundin e botës.

Rrëzë Qafës së Thanës, panair shurrash. Fëmijët që lajnë makinat, për të tërhequr vëmendjen e shoferëve mbajnë në duar tuba që e hedhin ujin lart; "Porsi malli i trimit që buçet përpjetë".

Anës Liqerit peshkatarët të grishin të blesh ngjala të gjalla që përdridhen nën çengela si kurva.

Nga Korça drejt Devollit, më të djathtë Plasa dhe Belortaja, më të majtë drejt fushës, një kthesë. Sapo ke hyrë në atë kthesë, thith një tjetër ajër, merr një tjetër frymë.

Është Kreshpanji!

Zoti më ruajt nga nëpunësit, shefat, sekretarët, kryetarët. Kreshpanji, kreshpanjarët, ata më duhen.

Fshati Kreshpanj ka 320 banorë, 68 Shtëpi, 1 traktor për 2 shtëpi, nja 50 autovetura, motoçikleta dhe biçikleta pa numërim.

-Sa tokë ka Keshpanji?

-840 hektarë. Marrim dhe 600 hektarë të tjerë me qira nga fshatrat përreth.

-Si ia dilni t'i kultivoni gjithato hektarë?

-Ka përparuar kapitalizmi këtej nga ne, ore. Kemi 120 krahë pune, 180 të tjerë i marrim me mëditje këtej rrotull.

-Çfarë mbillni e korrni në këto toka?

-Vetëm pllaqi, 250 ton pllaqi në vit.

Kreshpanji është vendi më i mirë në botë ku pllaqia bëhet më e shijshme, më e madhe, më e bukur, më e pastër, më e shëndetshme se kudo tjetër.

Pllaqia bëhet edhe nëpër fshatrat rrotull, por jo si në Kreshpanj. Burra, gra, të rinj, të vjetër, nga 10 në 100 vjeç ne punojnë të gjithë nëpër ara.

-Nuk kemi në fshat kafenera, bilardora, gjëra qefi. Qefi ynë është puna. Pllaqinë tonë vjen e merr greku e mbyll në kanaçe llamarine. Ato pllaqitë që emigrantët shqiptarë në Europë e gjetkë i blejnë nëpër supermarkete, janë pllaqitë tona, pllaqitë e Kreshpanjit.

-Eksportojmë 1 milionë dollarë pllaqi në vit. Po deshe të dish më tepër për ne dhe pllaqitë tona, pyet filozofët e kafeneve anës udhës.

-Pllaqitë i prodhojmë ne kreshpanjarët. Shpjegimet për pllaqitë i japin profesorët.

-Ju andej nga Tirana keni të mëdha pordhët e pllaqive tona. Ne këtej nga Kreshpanji kemi të mëdha pllaqitë e pordhëve tuaja.

-Ti kombinojmë pllaqitë e Korçës me pordhët e Tiranës.

-Ta ndërtojmë kapitalizmin me pllaqitë tona dhe pordhët tuaja!

©Edison Ypi